12 ნოემბერს გ. ჩუბინაშვილის სახ. ქართული ხელოვნების ისტორიისა და ძეგლთა დაცვის ეროვნულ კვლევით ცენტრში გაიმართა მცხეთის ჯვრის დიდი ტაძრის კონსერვაციის პირველი ეტაპის პროექტის პრეზენტაცია. პროექტს ახორციელებს გ. ჩუბინაშვილის ეროვნული კვლევითი ცენტრი ამერიკის შეერთებული შტატების ელჩის კულტურული მემკვიდრეობის ფონდის ფინანსური მხარდაჭერით, მსხვილი გრანტის ფარგლებში.
პროექტის მიზანია ჯვრის მონასტრის მთავარი ტაძრის საფასადო ქვის წყობის დაცვა შემდგომი დაზიანებისგან. პირველ ეტაპზე, რომელიც გაგრძელდება 10 თვე, ჩატარდება კომპლექსური მულტიდისციპლინარული კვლევა, რის საფუძველზეც მომზადდება კონსერვაციის სტრატეგია და შემუშავდება ჩარევის დეტალური გეგმა. საკონსერვაციო პროექტი შეეხება ტაძრის ქვიშაქვის საფასადო წყობას (ოთხივე ფასადსა და გუმბათის ყელს), რაც საერთო ჯამში შეადგენს ზედაპირის დაახლოებით 1200 კვ. მ-ს.

შუა საუკუნეების ხელოვნებისადმი მიძღვნილი საერთაშორისო ფორუმი, რომელიც 18-21 სექტემბერს ბერნის უნივერსიტეტში (შვეიცარია) გაიმართა, საქართველოსადმი მიღძვნილ ორ სესიას მასპინძლობდა. სესიები ორგანიზებული იყო ფრიბურგის უნივერსიტეტის მიერ, როგორც გაგრძელება სეზონური სკოლის პრექტისა “ტაო-კლარჯეთი, ისტორია და მემკვიდრეობა, მოძრავი და უძრავი ძეგლები”.
საქართელოსადმი მიძღვნილ სხდომებს Georgia as a Bridge between Cultures: Dynamics of Artistic Exchange უძღვებოდნენ ფრბურგის უნივერსიტეტის დოქტორები მანუელა სტუდერი და ტომას კაფენბერგერი.
გიორგი ჩუბინაშვილის ცენტრის სახელით კი მოხსენებები წარადგინეს ნინო ჭიჭინაძემ, ეკატერინე გედევანიშვილმა, ირინე გივიაშვილმა, ნატალია ჩიტიშვილმა, ირმა მამასახლისმა, თამარ დადიანმა.
საქართელოსადმი მიძღვნილი სესიები დასავლელ მეცნიერთა დიდი ინტერესის საგანი გახდა და სხდომები მსმენელით სავსე დარბაზებში გაიმართა, მოხსენებებს კი ვრცელი დისკუსიები მოყვა.