Author Archives: admin

 

2026 წლის 25-28 ნოემბერს გიორგი ჩუბინაშვილის სახ. ქართული ხელოვნების
ისტორიისა და ძეგლთა დაცვის ეროვნულ კვლევით ცენტრში იმართება საერთაშორისო კონფერენცია „ხელოვნება და არქიტექტურა შუა საუკუნეებისა და ახალი დროის საქართველოში: ისტორიული და კულტურული კონტექსტი“.

პროგრამა იხ. ლინკზე ქვემოთ

პროგრამა

Leave a comment
 

უცნობი საარქივო მასალების გამოფენა — „შუა საუკუნეების ქართული ხუროთმოძღვრება“

2026 წლის 19 – 23 ოქტომბერს, საგამოფენო სივრცე „Ars Georgica“-ში, გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნულ კვლევით ცენტრში დაცული უცნობი საარქივო მასალების გამოფენა — „შუა საუკუნეების ქართული ხუროთმოძღვრება“ შედგა.

გამოფენაზე წარმოდგენილი იყო სამი ქართველი ხელოვნებათმცოდნის — რენე შმერლინგის, ლევან რჩეულიშვილისა და ნიკო ჩუბინაშვილის — პირადი არქივებიდან შერჩეული მასალები, რომლებიც აქამდე ფართო საზოგადოებისთვის ხელმისაწვდომი არ ყოფილა.

ექსპოზიცია აერთიანებდა შუა საუკუნეების ქართული ხუროთმოძღვრების ძეგლების არქიტექტურულ ნახაზებს, ანაზომებს, ჩანახატებს, საექსპედიციო დღიურებს, ფოტომასალასა და სხვა საარქივო დოკუმენტებს. წარმოდგენილი მასალები ასახავს არა მხოლოდ ქართული ხუროთმოძღვრების ძეგლებს, არამედ მათი შესწავლისა და დოკუმენტირების პროცესსაც — მკვლევართა დაკვირვებებსა და სამეცნიერო საქმიანობის მეთოდებს.

გამოფენა განხორციელდა საქართველოს კულტურის სამინისტროს ფინანსური მხარდაჭერით მიმდინარე პროექტის ფარგლებში: „თინა ვირსალაძე, რენე შმერლინგი, ლევან რჩეულიშვილი, ნიკო ჩუბინაშვილი — უცნობი საარქივო მასალები (საარქივო ნახაზების, ჩანახატების, კედლის მხატვრობის ასლებისა და ფოტომასალის დიგიტალიზაცია)“.

პროექტი მიზნად ისახავს ოთხი ხელოვნებათმცოდნის პირად არქივებში დაცული მნიშვნელოვანი საარქივო მასალის გამოვლენას, დიგიტალიზაციას, აღწერასა და ელექტრონული პასპორტების შექმნას. გამოფენა ამ სამეცნიერო მემკვიდრეობის ფართო საზოგადოებისა და მკვლევართა წრისთვის გაცნობის შესაძლებლობას წარმოადგენდა.

გამოფენა „შუა საუკუნეების ქართული ხუროთმოძღვრება“ პროექტის პირველი საგამოფენო ეტაპი იყო. პროექტის მეორე ეტაპი შუა საუკუნეების ქართული კედლის მხატვრობის ამსახველი საარქივო მასალების გამოფენას დაეთმობა.

Leave a comment
 
 

რეცენზია

საერთაშორისო სამეცნიერო გამოცემაში The Byzantine Review (08.2026.032) კალიფორნიის სანტა ბარბარას ხელოვნების ისტორიისა და არქიტექტურის უნივერსიტეტის პროფესორის ჰეთერ ბადამოს რეცენზია გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნულ კვლევით ცენტრში მომზადებულ მონოგრაფიაზე „წმინდა მეომრები შუა საუკუნეების ქართულ ხელოვნებაში“ (რედაქტორები: ნიკოლოზ ალექსიძე, ეკატერინე გედევანიშვილი).
ჰეთერ ბადამო ბიზანტინისტიკის ერთ-ერთი გამორჩეული მკვლევარია. იგი განსაკუთრებით ცნობილია წმინდა გიორგისადმი მიძღვნილი მონოგრაფიით – Saint George Between Empires: Image and Encounter in the Medieval East (Penn State University Press, 2023), რომელშიც მნიშვნელოვანი ადგილი ეთმობა ქართულ მასალასაც.
Leave a comment
 
 

პრეზენტაცია

2026 წლის 17 ივლისს საფრანგეთის ხელოვნების ისტორიის ეროვნული ინსტიტუტის (INHA) სამეცნიერო კოორდინატორმა, არქეოლოგიის დოქტორმა სიფანა ჩაკერიანმა გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნულ კვლევით ცენტრში წარმოადგინა პრეზენტაცია: „ტიერების არქივი საფრანგეთის ხელოვნების ისტორიის ეროვნული ინსტიტუტის სამეცნიერო არქივში (პარიზი): კვლევისა და ციფრული წარმოჩენის პროექტი“.

ცნობილ ფრანგ მეცნიერებს ნიკოლ და ჟან-მიშელ ტიერებს მჭიდრო მეგობრული და პროფესიული ურთიერთობა ჰქონდათ გიორგი ჩუბინაშვილის ცენტრის თანამშრომლებთან. მათი მდიდარი ფოტოდოკუმენტური არქივის დამუშავება და ციფრულ ფორმატში გადაყვანა 2022 წლიდან მიმდინარეობს. მრავალ სხვა საინტერესო მასალასთან ერთად, არქივში დაცულია შუა საუკუნეების ქართული არქიტექტურისა და ხელოვნების ნიმუშების ფოტოსურათები და საველე ჩანაწერები, რომლებიც მკვლევართა მიერ საქართველოსა და თურქეთში წლების განმავლობაში მოწყობილი არაერთი ექსპედიციის დროს შეიქმნა.

Leave a comment
 

2026 წლის 23 ივნისს გიორგი ჩუბინაშვილის სახელობის ქართულ ხელოვნების ისტორიისა და ძეგლთა დაცვის ეროვნულ კვლევით ცენტრს ხანმოკლე ვიზიტით
ეწვივნენ ცნობილი ბრიტანელი ბიზანტინისტები − კურტოს ინსტიტუტის პროფესორი ენტონი ისტმონდი მეუღლესთან ერთად და სასექსის უნივერსიტეტის პროფესორი ლიზ ჯეიმსი.
ბრიტანელი მეცნიერები საქართველოში იმყოფებოდნენ შუა საუკუნეების ქართული სახვითი ხელოვნების ძეგლების მოსანახულებლად.
პროფესორ ენტონი ისტმონდს გიორგი ჩუბინაშვილის ცენტრთან თანამშრომლობის მრავალწლიანი ისტორია აკავშირებს, რომელიც ჯერ კიდევ 1990-იანი წლებიდან იწყება.
პროფესორი ლიზ ჯეიმსი კი პირველად ეწვია ცენტრს და დიდი ინტერესით გაეცნო მის საქმიანობას, სამომავლო გეგმებს, გამოცემებსა და ბიბლიოთეკას.
ბრიტანელ კოლეგებს შეხვდნენ ცენტრის დირექტორის მოვალეობის შემსრულებელი მარიამ გაჩეჩილაძე, სამეცნიერო საბჭოს თავმჯდომარე მარიკა დიდებულიძე და ბიბლიოთეკის გამგე ლელა კიზირია.

Leave a comment
 

ნოდარ აფციაური 75

გიორგი ჩუბინაშვილის სახელობის ქართული ხელოვნების ისტორიისა და ძეგლთა დაცვის ეროვნული კვლევითი ცენტრის საგამოფენო დარბაზ „Ars Georgica“-ში გაიმართა მხატვარ ნოდარ აფციაურის 75 წლის იუბილესადმი მიძღვნილი პერსონალური გამოფენა და მისი შემოქმედების ამსახველი წიგნის პრეზენტაცია.

ღონისძიების ფარგლებში წარმოდგენილი იყო ნოდარ აფციაურის სხვადასხვა პერიოდში შექმნილი ფერწერული და გრაფიკული ნამუშევრები, ასევე გამოიფინა ფართო საზოგადოებისთვის ნაკლებად ცნობილი კარიკატურები, შარჟები და სხვა გრაფიკული ნამუშევრები.

საზოგადოებას წარედგინა 272-გვერდიანი ორენოვანი წიგნი-ალბომი, რომელიც პირველად აერთიანებს ხელოვანის მრავალწლიანი შემოქმედების ძირითად მიმართულებებს – ფერწერას, გრაფიკას, ქანდაკებას, მხატვრულ მინას, დეკორატიულ-გამოყენებით ხელოვნებას, სამკაულებს, ექსლიბრისებს, საარქივო ფოტომასალასა და სახელოვნებათმცოდნეო ტექსტებს.

წიგნი გამოიცა თბილისის მერიის მხარდაჭერით.

Leave a comment